Met die Desembervakansie om die draai is ons gereeld besig om te dagdroom oor wat ons gaan doen tydens die vakansie. Miskien gaan jy lekker op die strand gaan lê of dalk is jy gepak vir ‘n bosvakansie in die wildtuin! Of miskien is jou naam Jan Tuisbly en gaan jy net hier by jou eie huisie vakansie hou.
Gewoonlik vang die depressie jou onkant as jy tuis bly, om welke rede ookal, maar om by jou huis te bly het ook sy voordele. Dis idees soos laat slaap, TV kyk tot die reeks klaar is en nie totdat dit jou slaaptyd is nie en om uiteindelik tyd te kry vir daardie boek wat jy al in Maart gekoop het, dit maak ons sommer opgewonde!
As avontuur iets is waarna jy smag, kan jy dit ook sommer hier in die Jakarandastad kry!
Ons het ‘n lysie van aktiwiteite vir ‘n onvergeetlike Desembervakansie saamgestel vir diegene wat daarna smag om Pretoria te verken.
Gaan stap ‘n bietjie!
Daar is niks so lekker as om ‘n bietjie in die natuur in te vaar nie. Pretoria beskik oor vele pragtige en veilige staproetes. Pak jou waterbottel, gryp jou hoed en jou stapskoene en gaan geniet ‘n dag in die sonnetjie saam met jou gesin of vriende.
Waar is die beste staproetes? Ons het vroeër vanjaar ‘n artikel geskryf wat al die beste staproetes in en om Pretoria opnoem. Gaan loer bietjie daarna: Kwikstert se gids na die beste staproetes in en om Pretoria! Kom jy saam?
Leer iets nuuts by een van ons plaaslike museums
Suid-Afrika het ‘n ryk geskiedenis- en kultuuragtergrond en Pretoria huisves vele van daardie skatte in die vorm van museums. Hier is ons topkeuses vir ‘n interessante museum dag-uitstappie!
Transvaal Museum
Die Transvaal Museum fokus meer op die wetenskaplike geskiedenis van ons land, as die kulturele geskiedenis. Hier sal jy fossiele, onder andere dié van die bekende Mev Ples kry, argeologiese uitstallings van verskeie ares en tydperke in Suid-Afrika en nog vele meer! Daar word ook gereeld interessante toesprake en toere aangebied … Vra bietjie oor hulle “Night Tours” en pakkette waar jy die museum kan besoek in die nag, dit sorg altyd vir ekstra opwinding!
Javette-UP Art Centre
Die Javette-UP Kunssentrum is ‘n splinternuwe uitstalling by die Universiteit van Pretoria se hoofkampus in Hatfield. Daardie nuwe brug wat nou oor Lynnwood loop – dis hy! Daar is verskeie uitstallings om te besigtig, maar as daar iets is wat jy graag wil sien – gaan loer self! Die uitstalling is gewoonlik net tydelik. Die huidige uitstallings is slegs tot Februarie 2022 beskikbaar, dan sal daar weer ‘n nuwe een volg.
Die Voortrekker Monument
Ek weet van te veel Pretorianers wat al jarre hier bly en nooit die Voortrekker Monument besoek het nie! Maak ‘n lekker gesinsdag daarvan, pak vir jou ‘n piekniekmandjie en gaan verken een van die mees majestueuse landmerke van ons land se geskiedenis.
Ek daag jou uit – tel al die trappe!
Fort Schanskop
Saam met jou Voortrekker Monument-uitstappie, besoek ook Fort Schanskop. Die groen gras onder die boom in die middel van die fort se grasperk is die ideale plek vir jou piekniek!
Kruger Huis
President Paul Kruger se huis, reg in die middel van Pretoria, is ook ‘n belewenis! Die huis is in 1884 gebou en was ook die eerste huis in Pretoria wat elektrisiteit gebruik het, asook die eerste huis om ‘n telefoon te installeer.
Sammy Marks Museum
Die Sammy Marks huis het, soos jy kan raai, eens op ‘n tyd die bekende entrepreneur en sy gesin gehuisves. Hierdie indrukwekkende eiendom is vandag ‘n museum en meeste van die items in die huis is destyds nog deur die Sammy Marks gesin besit. Om die huis groei die pragtigste rose – die perfekte uistappe vir ‘n somersdag. Gaan loop daar in die tuin rond, daar word ook gereeld voëlkyerstoere aangebied en sommige Sondae is daar etes. Dit is ook ‘n baie bekende bestemmig vir fotosessies! Gaan neem ‘n kiekie en deel dit met ons.
Kry weer ‘n bietjie kultuur!
Daar is ALTYD een of ander opvoering om te gaan kyk!
Barnyard Theaters
Daar is verskeie Barnyard Teaters in Pretoria. Gaan loer bietjie na die lys van vertonings wat in die feestyd aangebied word.
Atterbury Teater
Die Atterbury Teater bied ook ‘n groot verskeidenheid van vertonings in die komende weke aan. Onstpan met ‘n glasie wyn in hul netjiese teater en geniet ‘n deftige aandjie uit saam met jou beter helfte!
Afriforum Teater – Op die planke
Loop kultuur en vermaak by die Afriforum Teater raak. Hulle fokus op die Afrikaanse kunste. Eet ‘n maaltyd by die Pronk restaurant en geniet ‘n Afrikaanse vertoning vir die hele gesin!
Gaan swem iewers!
Soos die weer nou lyk, gaan hierdie Desembervakansie LEKKER warm wees! Ons soek altyd ‘n lekker plek om te gaan swem en ek het ‘n lysie van waterparke in en om Pretoria net vir jou saamgestel! Daar is vele meer, maar ons het mooi gesoek vir veilige parke met positiewe resensies, nou hoef jy nie dit ook nog te doen nie! Indien jy weet van ander waterparke in die area, laat weet gerus.
- Cedar Jucntion Family Resort, Pretoria Oos
- Hennops Waterpark, Centurion
- Happy Island Water World, Muldersdrift
- Sun City Waterworld
- Nkwe, Tierpoort
Pak ‘n piekniekmandjie
Piekniek hou is een van daardie tydlose aktiwiteite wat net nooit uit die mode gaan nie.
Hieronder lys ons ‘n paar van ons top piekniekplekke in en om Pretoria.
- Jan Cilliers Park
- Zita Parkie
- Fort Schanskop
- Die Botaniese Tuine
- Die Uniegebou
- Nkwe
- Lakelands Strawberry Farm
- Afroboer
- Die Druiweplaas
Bring Stellenbosch Pretoria toe!
Hierdie is ‘n lekker manier om bietjie van die Kaap in Pretoria te beleef – Wyn, gin en bier “tastings”.
Irene Farm
Irene Farm bied lekker kunsbier en Gin proe-geleenthede.
Waterkloof Wines
Waterkloof Wines het ‘n billike wyn-proe geleentheid. Gaan loer op hulle webtuiste vir meer inligting.
Labora Yard
Verkies jy ‘n ginnetjie bo ‘n wyntjie? Dan is Labora Yard die plek vir jou!
The Capital Distillery
Bespreek jou proe-geleentheid sommer direk op The Capital Distillery se webtuiste!
Capital Craft
Capital Craft is bekend vir hulle kunsbiere. Het jy al daar ‘n yskoue enetjie gaan drink?
Ter afsluiting…
Met soveel aktiweite in Pretoria, het mens nie regtig rede om ver weg te gaan vir ‘n lekker ondervinding nie! Neem foto’s van jou uitstappie en merk ons op sosiale media! Gebruik @kwikstert_ vir Instagram of @kwikstertontwerp vir Facebook en sê vir ons waar jy is.
*Vir veiligheid, plaas altyd jou foto’s van enige uitstappie nadat jy daar weg is.
Gaan rus nou ‘n bietjie! Na so riller van ‘n jaar (of twee), verdien jy dit!